I 1862 fekk dei gamle Åsebrekkene ny vegtrase` med sideveg til Åmotsdal. Som resultat av dette, blei Nutheim eit lite senter for handel, med skysstad, hotell, bakeri og gardsdrift.

Gina Thommesen kjøpte staden i 1901. Ho arbeidde opp ein stor fin hage i bakkane nedanfor hotellet. I 1917 kjøpte brørne Olav og Halvor Svartdal eigedomen, og det er deira familie som framleis driv den dag i dag.

Etter 2.verdskrig kom kunstnarane Erlend og Terje Grøstad til Nutheim. Som fleire andre kunstnarar forelska dei seg i natur og folk. Dei fann kvar si syster på hotellet. Anne og Erlend Grøstad overtok drifta i 1957, og har gjennom 50 år forma staden til det han er i dag.

Nutheim Målarskule starta i 1960, og tre år seinare flytte dei Hjartdal Gamle Prestegard  til Nutheim.

Erlend Grøstad fekk Seljord kommunes kulturpris i 1992, kongens fortenestemedalje i gull og Telemarks fylkeskulturpris for sitt arbeid med å føre vidare og skape norsk kunst.

Gjestgiveriet har vore påbygd fleire gonger, og 1988-89 laga Statens vegvesen ny vegtrase` rundt Nutheim. Vegen gjennom gardstunet vart borte, og den nye Nutheimsvingen gav betre plass og ro til den gamle skysstaden.

 Ellen Grøstad Barstad har i fleire år arbeidt saman med sine foreldre, og i 2006 tok ho over ansvaret for staden.